Vaali-informasuuni

13 syyskuuta oon vaalit valtiopäivile, rekiuuni- ja kunnanvaltuustole. Etukätheisäänestys alkaa jo 26 elokuuta ja jatkuu vaalipäivhään asti.

Kukas saapi äänestää ja äänestyskortti

Sulla jolla oon äänestysoikeus, sie tulet saamhaan äänestyskortin. Äänestyskortti näyttää, missä vaalissa sie voit äänestää ja mikä oon sinun äänestyspaikka vaalipäivänä. Äänestyskortti lähätethään digitaalisesti, jos sulla oon digitaalinen preiviloova, elikkä tavalisheen preiviloovhaan. Jos sie tarttet saa uuven äänestyskortin, sie voit saaha sen Luulajan kunnasta. Informasuunia kuinka sie piät toimia löytyy alempana.

Uutisia vaalista

Uutta vaalissa oon se, ette äänestyskorttia ei ennää vaaita ette saa äänestää. Se riittää, että sie voit itenttifieerata ittesti etukätheisäänestyspaikala eli vaalipaikala. Uutta oon kans se, ette jokku vaalidistriktit oon vaihtanheet paikkaa. Lue tarkasti sinun äänestyskortista, missä oon sinun vaalipaikka.

Kuinka äänestethään

Äänestä vaalipäivänä

Sie saatat äänestää sinun vaalipaikala vaalipäivänä. Sinun vaalipaikka löytyy äänestyskortista. Sie et tartte ottaa mukhaan sinun äänestyskorttia ette saattaa äänestää vaalipaikala vaalipäivänä. Se riittää, ette sie voit itenttifieeerata ittesti id-paperila eli ette joku muu henkilö saattaa toistaa sinun itenttiteetin. Tämä henkilö häätyy omasta puolesta näyttää id-paperin.

Etukätheisäänestys

Sie saatat etukätheisäänestää äänestyspaikala. Etukätheisäänestys alkaa 26 elokuuta ja jatkuu vaalipäivhään 13 syyskuuta asti. Sie saatat etukätheisäänestää millä hyvänsä etukätheisäänestyspaikala koko maassa. Sie et tartte näyttää äänestyskorttia ette äänestää etukätheisäänestyspaikala. Se riittää, ette sie saatat itenttifieerata ittesti id-paperila eli ette joku muu henkilö saattaa toistaa sinun itenttiteetin. Luulajan kunnassa sie voit etukätheisäänestää monessa paikoissa.

Tuki etukätheisäänestys- ja vaalipaikoila ja informasjuunia tiloitten käytettävyyestä

Sulla jolla on toiminaneste eli vastaavaa ja tarttet asistansia äänestyksen hoitamisessa, sie voit pyytää apua äänestyspaikan äänivasthaanottajalta. Hällä oon vaitiolovelvolisuus. Hän auttaa sinua sen kun sie tarttet. Sie saat kansa ottaa apua joltaki muulta, joka pruukaa auttaa sinua mutta silloin äänivasthaanottaja häätyy olla matkassa. Sulle jolla on huono näkö oon luku-TV etukätheisäänestyksessä Luleå Energi Arenala, se isontaa vaalisetelitten tekstiä. Kaikitten äänestyspaikkojen käyettävyyestä löytyy informasuunia.

Äänestää asiahenkilön eli kiertävän äänestyksen vasthaanottajan kautta

Äänestäjät, jokka iän, saihrauven eli toiminanestheen vuoksi eivät pysty tulheen etukätheisäänestys- eli vaalipaikale, voivat äänestää asiahenkilön eli kiertävän äänivasthaanottajan kautta.

Äänestäjät, jokka on piätetyt puliisin fankilassa eli hoitolaitoksessa, joka rajottaa maholisuuksia etukätheisäänestystä vaalipaikoila, voivat äänestää kiertävän äänivasthaanottajan kautta. Äänestäjät, jokka asuvat kylitten postikantajan linjoila eli oon fankilassa eli anstaltissa, saattavat äänestää asiamiehen kautta.

Äänestys asiamiehen kautta tarkottaa, ette joku muu kun sie itte viepii sinun äänen etukätheis äänestys- eli vaalipaikale. Asiamiehen kautta äänestyksheen sie tarttet erityisen äänestysmateriaalin. Jos sie et tunne kethään, joka voisi toimia sinun asiamiehenä, Luulajan kunta voipi järjestää kiertävän äänivasthaanottajan. Sitten kaksi äänivasthaanottajaa tullee sinun tykö äänestysmateriaalin kans ja ottavat vasthaaan sinun äänen. Sie voit saaja asiamies äänestysmateriaalia ja varata kiertävän äänivasthaanottajan Luulajan kunnan kautta. Katto informasjuunia alempana.

Kontaktitietoja

Ota yhteyttä Luulajan kunthaan telefooni 0920-45 30 00 eli e-postin kautta lulea.kommun@lulea.se ette hoitaa seuraavat asiat: Varata kiertävän äänivasthaanottajan, tilata asiamiesäänestysmateriaalia eli jos sie tarttet saa uuven äänestyskortin.